lørdag 14. januar 2012

Serierenn på Sjusete

Kvart år vert det arrangert fem serierenn på Sjusete skiarena.  Dei yngste borna får premie om dei er med på minst tre av renna.  Når dei vert eldre er det tidtaking og premie til dei beste.  
Peter har fått startnummeret og er klar

Det var fyrste gongen for både Peter
og Karina, så eg fylgde Peter rundt
den 1,3 km lange løypa.

Litt knall og fall i nedoverbakken.

Når løparane kjem i mål, får dei varm
saft.  Otto hadde rekna med at han
skulle gå på tid i år, men det er fyrst
neste år.

Andføtes

Peter har egentleg rom i kjellaren, men han torer ikkje sova der. Martin og eg ligg i køyeseng i hovudetasjen, og no bur altså Peter og på mitt rom.  
Eg legg dei som regel til å sova i kvar sin etasje i
senga.

Men når eg legg meg, legg eg begge i same etasje.

Så ligg dei der andføtes med kvar si pute og ei
220-dyne på deling.  Til våren tenkjer eg dei får
flytta ned på rommet i kjellaren begge to.

torsdag 5. januar 2012

Ting tek tid

For snart åtte år sidan abbonerte eg på eit handarbeidsblad.  Eg ville gjerne sy bukser til eldstemann, så eg kjøpte dongeristoff (på Stof & Stil i Roskilde).  Men så skulle me flytta til Norge, og prosjektet vart nedprioritert.  Då me budde på Hellvik, klipte eg ut delane.  Guten hadde vakse, men eg hadde kjøpt rikeleg med stoff, så det var nok til å sy buksene i str 6 år.  Men syinga fekk eg ikkje tid til på Hellvik heller.  Var på nippet til å kasta heile prosjektet då me skulle flytta til Norheimsund, men eg ville gje det ein siste sjanse...

No er eldstemann ni år, men eg har ein gut på fem,
så han skal få ny bukse.  Eg fann igjen bladet med
mønsteret og alle delane.  Strikket er selen frå ei
kassert dynebukse.  Måtte kjøpa ny spole med
brunoransje dongeribuksetråd.

Sjølv om denne modellen er ganske tidlaus, valde eg
å ikkje sy heilt etter oppskrifta.  Eg hadde heldigvis
ikkje klipt beinstykka i tre deler slik det er tenkt
ifylgje mønsteret. Og sidan modellen er litt vid,
valde eg å heller ha løpegang med strikk nede
på buksa enn å falda opp på vanleg måte.

Ferdig bukse!

Pynta lommene med fine saumar.

Løpegangen nedst på beina er av eit tynnare bomulls-
stoff for at det ikkje skulle verta for klumpete.

Same stripete bomullsstoff inni lommene.
Viser egentleg ikkje, så eg må visa det
fram her.

lørdag 24. desember 2011

Vetlejulafta

Den enklaste måten å få inn juletreet 
var å heisa det opp på verandaen 
utanfor stova.

Sidan det er 3,6 m under taket i stova, 
tykte eg det ville verta pjarre med eit tre
på 2 m, så eg fekk Johannes til å henta
eit "bedehus-tre" på 3 meter.  Det var 
berre så vidt eg klarte å setja stjerna i 
toppen, og det tok 1,5 time å pynta det.

 Men eg syntest det var verd det.

Hjarta sydd av gamalt putetrekk



Skjortene til julafta og 1.juledag er strokne og klare.

lørdag 17. desember 2011

Sidan eg malte gangen for tre månader sidan, har det vore ganske ukoseleg, ingenting på veggene og berre ei kjedeleg bokhylle.  No har eg fått inn kommoden som eg redda frå pappen sin verkstad for mange år sidan.  Sjølv om eg har avluta han, er det enno oljeflekker på han.
Før

Denne spegelen passa ikkje heilt inn, så eg "friska han litt opp"

Etter: Veggene er malt i same farge som stova.  Eg skrudde nokre drivvedbitar på spegelen frå baksida.  Eg synest det vart ganske triveleg, men Peter synest spegelen vart styggare.


søndag 4. desember 2011

2.sundag i advent

Eg brukar desse bileta sjølv om eg tok dei for ei veke sidan.  Det fine maleriet har Anne Reidun Våge laga - eg fekk det som avskjedsgåve frå nokre gode veninner i Egersund.  Det er fint å verta minna på at Guds Ord er rettleiing for livet vårt.  Me kan vandra trygt når me set vår lit til det som står i Bibelen.
 Joel 3,5:  Kvar den som påkallar Herrens Namn, skal verta frelst.
Hebrearbrevet 10,39:  Men vi er ikkje av dei som dreg seg unna og går fortapt, vi er av dei som trur til frelse for sjela.
Lukas 12,40:  Ver då budde de og, for menneskesonen kjem i den timen de ikkje tenkjer det.

Dette er nøkkelversa i kvar av tekstane for denne sundagen.  Bodskapen i tekstane er at rett før Jesus kjem att, skal det henda underlege ting.  Gud let dei tinga henda for å vekkja oss, varsla om at no kjem Jesus snart og hentar dei som trur på han.  Kvar den som kallar på Herrens namn, det vil seia vedkjenner seg å tru på Jesus, skal verta frelst.  Gud gjer den rettferdig (=utan synd, kan ikkje dømast skuldig) som trur at Jesus har betalt for hans eller hennar kriminelle gjerningar (=brot på Guds bod i tankar, ord og gjerningar).  Så enkelt har Gud gjort det for at sjølv born og enkle menneske skal kunna nå himmelen.  Lat oss ta dette på alvor og ha Jesus i hjarta vårt (=stadig lesa og høyra om han så han ikkje vert fortrengd av andre ting) så me kvar dag er klare til å verta henta.  For det er ingen som veit kva dag det skal henda.

fredag 2. desember 2011

Forsøk på julebrev-fotografering

Eg prøvde å ta bilete av borna som skulle brukast i julebrevet.  Det måtte litt sjokolade til for å få dei til å smila så fint.  Tanken var at de skulle få sjå utsikten, men det var skodde den dagen.  Så det enda med at eg brukte 17. mai-biletet i staden.