mandag 5. august 2013

Pennalhus på ein halvtime

I morgon skal eg på kurs på skulen, så eg sydde meg eit nytt pennalhus i kveld.  Det tok faktisk berre ein halvtime!  Eg bruka litt tid på å finna oppskrift og velja stoff fyrst, så i alt gjekk det nok ein time.

 Her kjem syinstruksjon viss du har lyst å sy deg eit sjølv:

 Klipp to stoffstykke på 28x24 cm (eller 28x28cm viss du vil ha det litt større, det gjer eg neste gong).  Det eine stoffet er dongeri, det andre eit tynt bomulsstoff.  Om du brukar to tynne stoffkvalitetar, bør du stiva av med eit tynt vattlag.  Du treng ein glidelås på 30 cm og evetuelt to bitar band på 6 cm.  

 Legg dei to stoffstykka rette mot rette og nål fast glidelåsen på langsida, mellom stofflaga.

 Sy i glidelåsen.  Fest dei motsette langsidene av stoffa til andre halvdelen av glidelåsen og sy fast der og.

Viss du no har skjøna den kronglete forklaringa mi, ser det slik ut.

Vreng arbeidet slik.

 Legg ein bretta bandbit i kvar ende og fest med nåler.  Pass på at glidelåsen vert midt på når du skal sy saman endane.

 Siksakk over sårkantane.


 Set nåler i slik

Sy ein loddrett saum 2,5 cm ifrå spissen. (Ikkje så lett å sjå her)

 Ferdig!

 Pennalet er sydd av dongeristoff og eit stoff med kartmotiv.

Hempene er greie å halda i når ein skal opna og lata att glidelåsen.

lørdag 3. august 2013

Sandkasse

Borna er veldig glade i å leika i sandkasse, men eg har ikkje prioritert det før no, det vil seia: to av brørne mine ringde ein dag og spurde om dei skulle koma og laga sandkasse (me hadde snakka om det før at dei skulle hjelpa meg).

Johannes og Karina lagar ramma. 

No er ramma klar, og Anders er og hentar sand.

Sanden måtte trillast ned til huset i trillebåre, det vart ein del lass.

 Heldigvis nedoverbakke.

Johannes fekk den geniale ideen å setja opp ei plate slik at me tippa sanden utfor kanten, og han kunne renna ned i sandkassen.  Ikkje så lett å trilla ned trappa med sand i trillebåra. 
 (Fotografen er under 10 år)

 Sandkasse under tak er luksus.  Litt mindre luksus at sanden er så nær kjellarinngangen, men eg skal få tak i ei større matte.

Snille onklar som lagar sandkasse.  Avtalen er at me skal koma og pitla stein hjå Anders når det vert fint nok ver!

Handling på favorittbutikken min

Eldsteguten har vore på sommarkorpsleir på Manger i nokre dagar.  Då me skulle henta han, var me innom favorittbutikken min i Åsane, der fann eg ein del ting:

Fin tunika i dongeristoff

Smykke av treperler. 

 Smykke av porselensperler.



Tunika i tynn bomull.

 Stropp midt på ryggen som held vidda litt inne.

 Søte knappar.


 Rutete bluse (eg elskar ruter).


Capribukse

 
 Og til slutt det eg eigentleg var på utkikk etter: ein sommarkjole.  Det spørst berre om eg kjem til å bruka han, han var litt vel rosa!  Og no skal eg avsløra kva butikk eg har vore på:  FRETEX.  Tre av plagga var heilt nye, og til saman betalte eg 340 kroner for desse tinga.  Veldig godt fornøgd!

Etter me hadde vore på Radøy, stoppa me ved Tellevik kystfort og kikka på kanonane.

mandag 15. april 2013

Hardangerbrua, rundkøyring inne i tunnell og dekka bord!

Skikkeleg hummar og kanari her i dag:
 Me var på besøk i Vallavik i påsken, og fekk sjå Hardangerbrua. Alle vegelementa utanom eitt i kvar ende var på plass.

For å koma ut på Hardangerbrua, må ein ta av i rundkøyringa inne i tunnellen.  Altså når brua er ferdig.

 Litt spektakulært med rundkøyring inne i ein tunnell!




mandag 25. mars 2013

Kva heng på veggen over senga?
















 Det er eit nedfellbart arbeidsbord!  Når eg held på med syprosjekt og særleg når store stoffstykke skal klippast, har eg sakna eit stort arbeidsbord.  Har bord i stova, men eg vil helst ha symaskin og utstyr ståande permanent her på soverommet.  I nokre veker har eg grubla på korleis eg kunne få det til her på sove- og hobbyrommet mitt.  Eg kjøpte ei kryssfinerplate litt større enn senga mi og stiva ho av med kløyvde golvbord på undersida.  To bein i dei framre hjørna og hengsler inn mot veggen.  Alt vart mala i same farge som veggen.
Viss eg ikkje vert ferdig med eit prosjekt før leggetid, går det i nauda an å dra fram senga og sova litt trongt. No må eg berre få tid til eit prosjekt for å prøva ut bordet!