mandag 10. desember 2012

Me går på skeiser

Det har vore frost ei god stund no, og sidan det var meldt snø frå laurdag kveld, lova eg borna at me skulle skeisa laurdag ettermiddag.  Eg prøvde å bruka det som motivasjon for å rydda rommet ferdig på føremiddagen, men det var ikkje alle som klarte det.  Alle fekk vera med likevel.  Pappen har grave ut ein dam i elva som går frå Vetlavatn og langs lysløypa.  Der er det under ein meter djupt, så det er fint å bada for små born om sommaren, og trygt å skeisa om vinteren.
 
 Martin har ikkje prøvt å skeisa før, og følte seg tryggast på sko i starten.

Men så fekk han skeiser på og ein mjølkekasse å halda seg i.  Isen var ikkje glatt nok, så det gjekk ikkje så godt med mjølkekassetrikset.  Han klarte etter kvart å halda balansen, men det med fråspark forstod han ikkje heilt.

Karina er flink som berre det.  Sjølv om isen var ganske kupert på grunn av at vasstanden hadde minka under isen, heldt ho seg for det meste på beina.  Det som var skumlast, var å setja skeisene fast i isen der han var porøs.  Men dei områda lærte me raskt å unngå.

Peter lika seg best på denne.  Pappen hadde teke med eit langt tau så han kunne dra og snurra borna rundt på snowraceren.

Otto fekk skikkeleg dreisen på skeisinga.  Farfaren hans var i si tid i noregseliten i kortbaneskeising, så det skulle vel berre mangla.  Den største runden me klarte å laga til på isen var 50 meter, og Otto gjekk både 500-meter og 1000-meter. 



Dette var ein av dei vellukka turane våre trass i at eg verken hadde med kakao eller noko anna godt! Hadde vore kjekt med fleire skeisedagar i vinter.

Bord frå Steinsdalen Skule

I førre innlegg lova eg å fortelja meir om dette bordet.  Det vart til overs då Norheimsund Friskule overtok lokala til Steinsdalen Skule i haust, og det skulle hivast viss ikkje nokon hadde bruk for det.  Eg synest det var sjarmerande og tenkte at eg kunne ha det i gangen eller i stova.
 
 Det var malt i ein fin lys blå farge, men eg bestemte meg ganske raskt for å mala heile bordet på grunn av det mørkegrøne linoleumsbelegget oppå.

Eg tippar at bordet er like gamalt som skulen.  Lurar på om han var bygd på 50-talet?

Handtaka var mala i ein litt mørkare nyanse.


Linoleumen hadde nokre ganske kraftige riper, så eg har sparkla litt både her og andre stader.

Bordet grunna eg for eit par månader sidan, og i dag fekk eg endeleg malt eitt strøk med Supreme Finish.  Det vart kvitt, synest det var tryggast i stova mi.  Så kan eg heller gje det ein farge seinare viss eg synest det.  Supreme Finish luktar så lite at eg kunne mala inne i stova.  Malinga har ganske kort opningstid (den perioden det går an å arbeida med malinga før ho stivnar), så ein må gjera ferdig ein og ein flate.  Trikset er å ha nok maling på og ikkje ha det for varmt i lokalet der ein malar.  Eg likar best å bruka rull til å påføra malinga, då får ein eit glatt og fint resultat.  Kjem tilbake med bilete av det ferdige bordet snart.

søndag 18. november 2012

Og sengebotnane vart til...

...kassar til å ha under bordet i stova. 
 
 Eg må fotrelja dykk om bordet ein annan gong.

 Eg beisa kassane med Jotun Interiørbeis farge drivved.  Viss eg ikkje hugsar feil kosta boksen nesten 300 kr!  Godt eg hadde fått materialen, ellers hadde prosjektet vorte ganske dyrt.  Legg merke til at eg har interiørblad med prislapp frå Miljøbutikken Plant Eit Tre i Øystese.  Den vesle raude prikken er ein prislapp som betyr 20 kr. 

 Fordi treet var ganske gulna, vart fargen gulare enn eg hadde vona.  Hadde håpa kassane skulle få omlag same farge som vedkorga i bakgrunnen.  Men eg er fornøgd, det vart meir heilskap når eg fekk kassar under bordet. 

To sengebotnar gjekk med til dei tre kassane.

Eg hadde ein verkstad i kjellaren, no vert det snart bad der.  Høvlebenken og verktøyet måtte flyttast inn på eit lagerrom, så eg har litt trongare kår.
 


onsdag 31. oktober 2012

Før og etter på Martin sitt rom

Kom og sjå korleis Martin har fått det på rommet sitt:
 
Før: rosa og grå tapet er ikkje Martin sin stil.
 
 Etter: Tapeten vart malt kvit. Møblane er malte i friske fargar som går igjen i tekstilane.  Sjå innlegg om vimpelrekkja her og kassane på veggen her.
 
Har ikkje før-bilete av bordet og stolane (har egentleg av stolane, men giddar ikkje finna dei fram)  Men bordet var trekvitt, og stolane fann eg i ein konteinar ved Hellvik Skule.  Dei var kasserte fordi seta som var fletta, hadde gått sund.  Eg tenkte lenge eg skulle fletta nye sete, men så var det til at eg laga sete av nokre hylleplater eg fann i ein konteinar ved Rundevoll Skule!  Tusen takk, Eigersund Kommune!
 
Før: Rosa skap, matcha tapeten fint, men...
 
Etter:  Skapa vart og kvite.

 Senga var trekvit, malte ho i fargen "Pirat", veldig fin turkis.  Det var berre skap oppe langs taket på dette rommet, så eg kjøpte eit klesskap på Ikea som eg måtte saga av litt for å få til å passa.
 

 
Før:  Heilt vanleg korktavle.

Etter:  Trekt med stoff.
 


Dette laga eg av dei gamle hylleplatene

Det vart hyller på Martin sitt rom!
 
 Det er lite golvplass til overs på Martin sitt rom, så eg laga kassar av dei gamle hylleplatene og mala dei i friske fargar og hengde dei opp i passeleg høgd for ein fireåring.



Rillene i platene gjer at det går an å setja bilete oppå kassane.

søndag 14. oktober 2012

Kva kan dette verta?


Eg har det slik at eg har vanskeleg for å kvitta meg med ting.  Og eg blir lett freista til å ta ting som andre har kvitta seg med.  Når eg er på bosplassen, kan eg ikkje lata vera å kikka ned i kontainarane for å sjå om det er noko fint der.  Men eg har til no ikkje klatra ned for å henta noko.  Det gjeld spesielt tre og stoff.  Eg har eit heilt lager av diverse treplater, lister og fjøler og har planar eller idear for ein del av dei. 

Sengebotn.  Eg har fire stykke, kvar med 16 fjøler, nokon som kan gissa kva eg vil bruka dei til?  Det vil seia, eg er i gang, men vil ikkje visa det heilt enno.

Så har eg ein del hylleplater som eg fann i ein konteiner utanfor Rundevoll Skole i Egersund.  Det vil seia Otto fann dei, men no har me gjort ein bytehandel sidan eg fekk ein ide til bruk av platene.  Snart ferdig med det prosjektet og. 

onsdag 3. oktober 2012

Klokke med mønster frå porselen

Sjølv om eg ikkje greidde få biletet rett veg etter eit par forsøk, skjønar de at dette er ei klokke.  Me fekk henne til bryllaupet, og har hatt henne på veggen i nokre år.  No har ho lege i ein kasse fordi eg ikkje tykte det passa med trekvitt på kjøkenet lenger.
 

Men eg hadde ikkje lyst å ha ho heilt kvitmalt heller
 
 Så eg let meg inspirera av kvardagsserviset mitt, Anna frå Figgjo.
 Ikkje heilt lett å mala fint med interiørmaling, men på avstand ser det ok ut.
Malingen må turka før eg kan hengja klokka opp, skal ta bilete av både klokka og kjøkenet seinare.