søndag 6. november 2011

Utsiktsstova

Etter fem månader føler eg at eg har fått nokolunde kontroll på dei fleste romma i huset.  Men den påbygde delen av stova har eg vore ganske frustrert over.  Det er gulna panel på vegger og i taket, og eg får ikkje lov å mala (orkar egentleg ikkje tanken på det heller, det er ganske høgt under taket).  
Eg sette opp nokre kvitlakkerte IVAR-hyller, men det vart heilt feil.  Det var då eg fekk ideen:  mala dei kvite og innreia i maritim stil!  Eg demonterte hyllene og no held eg på å mala dei.
Utsikten er det ikkje noko å seia på.  Eg kan forsvara ein maritim stil her, tykkjer eg .

Skaisofaen har ein slags burgunderfarge, trur det går an å piffa han opp med puter  med striper og stjerner på.  Dei to TV-benkane skal ut når eg får lagringsplass i dei kvitmalte hyllene.
Har ein del stoffrestar med striper og stjerner etter at eg laga puter og gardiner til Otto sitt rom (skal ta bilete og visa ein gong det er ryddig der...)
Kunne tenkt meg slike hyller, men det har eg ikkje budsjett til.
Særleg ikkje når eg enno har ein del IVAR-deler igjen.  Det er eit  fleksibelt hyllesystem frå IKEA som egenleg er litt kjedeleg, men veldig praktisk for dei som flyttar rett som det er.  Eg har sett opp kvitmalte IVAR-hyller på alle soveromma og er ganske fornøgd med det.  Eg må vedgå at eg som tenåring kritiserte  mor mi fordi dei hadde IVAR-hyller i stova, eg meinte det var stygt.  Me kjøpte det då me budde i Danmark fordi det var dei billigaste hyllene og plassert dei overalt, og i stova. No gjer eg det igjen, trur eg må be henne om orsaking snart...

Ottava lampe frå IKEA, har montert to av slagsen.
Har ein slik benk ståande ute på balkongen utanfor stova no om vinteren, men eg vil sy puter til  han og ta  han inn i stova, det vil passa godt til stilen.


søndag 25. september 2011

Peter sitt rom

Eg skulle ta bilete av Peter sitt rom i dag til bloggen, og ville jaga han ut. Det synest han var heilt urimeleg! Han har heilt rett, det er hans rom, så han (og Martin) vart med på bileta.









Før: Dette rommet var nok det som aller mest trong oppussing: rosa tapet, malt panel, umalt panel, blått og kvitt tak, øydelagde gardiner.



Etter: Alle veggene i same farge gjorde susen! Peter og eg var samde om at han skulle få lysegrønt rom. Eg kjøpte ein veldig lys grøn maling og sette i gang med å mala. Peter fekk sjå då eg hadde malt eitt strøk, og utbraut skuffa: men det er ikkje grønt! Så eg måtte på fargehandelen og få meir farge i, no er han veldig fornøgd!





Før: Det stod ei dobbeltseng i rommet (du ser så vidt hjørnestolpen) og tok nesten heile golvplassen.



Etter: Peter har fått Otto sin gamle sovesofa. Den var trekvit og hadde stofftrekte plater i endane. Peter ville ha heile senga grøn, eg synest det kunne verta litt for mykje grønt, så eg malte sjølve senga kvit og fjerna stoffet frå sponplatene og mala dei grøne.



Før: Teakdør



Etter: Det var finare med kvit dør. Ikkje så lett å sjå, men både taket og bjelkane er kvite no.




Før: Då eg flytta dette klesskapet for å mala bak, datt det frå kvarandre. Fukt+sponplatemøblar=uff.



Etter: Laminatgovet har og teke skade og er nedsige. Etter det dei seier er årsaka til fukta vekke
Men til eg får gjort noko med golvet (fugeskum?) står det nye klesskapet slik, det går ikkje an å opna dørane viss det ikkje står tilnerma beint.


Peter og Martin kosar seg mykje saman på rommet. Førebels er det berre Peter som søv der, dei klarar ikkje roa seg viss dei legg seg på same rom.



Peter ville syna at det går an å ta skuffa av gravemaskina...


...og på igjen.











Flyttetips

Basert på erfaringane med flyttinga vil eg dela nokre tips her:


1. Det er ein fordel å få målt opp romma i det nye huset og eventuelt få nokre bilete så ei kan planleggja kva møblar som passar inn og kva det er aktuelt å kvitta seg med.


2. Samla banankassar i store mengder. Eg brukte 50 til 60. Eg føretrekkjer banankassar fordi dei er gratis og meir solide enn flyttekassar. Dei er litt mindre, det er ofte ein fordel, lettare å ha oversikt. Brukte nokre flyttekassar til ting som var for store til banankassar. Til bøker og andre tunge ting er dei perfekte. Spør etter banankassar i daglegvareforretningar, der er dei vanlegvis glade for å verta kvitt dei.


3. Start så tidleg som mogeleg med å pakka ned ting ein ikkje skal bruka meir før ein flyttar som julepynt, vinterklede (alt etter sesong, sjølvsagt). Kast ting du ikkje har bruk for (eg er ikkje flink til det). Pakk glas og porselen inn i avispapir.



4. Etter kvart som eg pakka kassane, merkte eg dei med kva som var i, og limde på ein farga papirlapp (med blank teip) med kva rom kassen skulle til. Det gjorde det lettare å finna igjen dei rette kassane då alt vart sett i garasjen i det nye huset.




5. Viss kassane skal mellomlagrast, er det ein veldig fordel å stabla dei med innhaldspåskrifta fram.


6. Flyttefirma er veldig dyrt! Eg allierte meg med eit syskenbarn som skulle flytta motsett veg omtrent samtidig med meg. Saman snakka me med eit anna syskenbarn som disponerte lastebil på arbeid. Han ville køyra gratis, me skulle berre betala for diesel og ferje- og bompengar. Dermed kom eg ifrå det med 2000 kr. I tillegg lånte eg ein tilhengjar og fekk flytta ein del ting då eg reiste heim på påskeferie nokre månader før eg flytta.

søndag 4. september 2011

Tur gjennom Børvehagane til Råe

Mammo, eg og dei tre minste borna gjekk frå skytebanen og til Børve sundag ettermiddag. Me skulle besøkja oldemor Anna i Råe.


Det regna skikkeleg godt, så me kledde oss fornuftig med gode regnklede. Berre dei som hoppa skikkeleg i alle pøyser vart våte... Peter går i Utegruppo i Tolomarka Barnehage, og dei har ein lavvo i skogen som me gjekk forbi. Både Peter og Martin har gått mykje på tur i dette området i haust med barnehagen, og dei var veldig ivrige etter å visa oss vegen.




Raud flugesopp, veldig fin og veldig giftig.






Borna "snakka i telefonen" til kvarandre gjennom dette røyret og sende pinnar og lauv, det rann ganske godt sidan det regna så mykje.





Martin har laga ein bukett at blad. Pappen henta oss øvst på Børve, då var nokon litt leie av å gå, og kakene smaka veldig godt etter den friske turen.







lørdag 3. september 2011

Roten vegg på Otto sitt rom

På den eine veggen på Otto sitt rom er panelet skada av rote nederst.

Årsaka til roten er ordna og det er heilt turt, men veggen er ganske holete.






Tenkte at eg kunne fylla hola med billig fugemasse





Men det vart ikkje så vellukka.





I garasjen låg det ein del panel, akkurat nok til å dekka veggen, så no skal det verta fint.

fredag 26. august 2011

Kjøken

Då er kjøkenet klart til å verta presentert. Litt småting som manglar enno, eg må bruka litt tid til å finna ut korleis eg skal ha det.



Før: Kjøkenet var ganske lyst, men veldig gulna og slite. Vifta var ganske ulekker.




Etter: Ny vifte, min steikeomn, nye skap over og til venstre for vifta og kitchen board på veggen.





Før: Gardinene stal ganske mykje lys. Kjøkenet vender mot nord og får aldri direkte sollys.





Etter: Lettare med berre kappe, men ho er litt sid, skal kanskje leggja henne opp. Skal og få opp ein lampe i taket over vindauga.





Før: Dette kjøkenet er ein meter lengre enn på Netland, så eg kan opna oppvaskmaskina utan å flytta stolen ved enden av bordet!





Etter: Har tenkt å hengja opp nokre skap på veggen over bordet, det er ikkje så veldig god skapplass.





Før: Ikkje så godt å sjå på dette biletet, men det er ein ganske falma tapet på veggen.





Etter: Hengde opp denne hylla i dag. Tenkte å stilla ut borna sine kunstverk her. Veggen er malt i Vanilje (lys beige), tak og lister i Bomull (nøytral kvit)og alle skap i Claro (varm kvit).





Før: Skuffeseksjonen var ganske sliten på overflaten. Men sidan dei er snikra i heiltre, var det berre å sparkla og mala dei.





Etter: Nye grep på skuffer og skap friska opp. Desse er frå IKEA og heiter Grej.





Skyvedørane har innfelte originale innfelte grep, så dei synest eg ikkje skulle skiftast.




Før: Denne vifta fekk eg. Heilt ny og REIN, men eg synest det var litt trist med svart, så eg spraylakkerte ho kvit.


Etter: Ikkje så mykje som viser, men det var godt eg gjorde det.







fredag 19. august 2011

Stova

No måtte eg berre visa korleis det har vorte i huset me leiger. Finn ikkje digitalkameraet, men med lyskastar og kameraet på den bærbare PC-en fekk eg då eit par bilete. Eg er ferdig å mala stova, kjøken og to soverom. Det siste soveromet skal eg mala når eigaren har rydda det, skal ikkje nemna namn...





Her kjem før og etter-bilete frå stova:





Før: Fyrste gongen eg kom inn i stova såg det slik ut. Det var ein beige farge på veggene, og både vegger og tak var ganske gult av nikotin. Tunge, mørke gardiner. Heldigvis forsvann nesten all røykjelukten då eg tok vekk gardinene.




Etter: No er alle vegger malt i ein lys beige, Sans. Veldig fornøgd med den fargen. Lingardiner frå IKEA som eg skal leggja opp ein vakker dag. Bord og stolar frå eit flyttesalg. Måtte mala beina på bordet, dei var knall blå!




Før: Eg leiger egentleg huset møblert, men eg kan setja ut i garasjen det eg ikkje vil ha inne






Etter: Heile taket er malt kvitt no.









Før: Eit hjørne av stova var umalt panel, det var herleg å få alt i ein farge









Etter: Karina søv på sofaen mens eg gjer hennar rom heilt ferdig. Eg monterte senga hennar i går, men fann ut at då går døra nesten ikkje opp, så den må stå ein annan plass på det vesle rommet hennar. Men då er senga to cm for lang, så eitt av prosjekta i morgon er å skjera av senga.









Før: Dette før-biletet er betre enn etter-biletet. Det er veldig fin utsikt her me bur.









Etter: Og veldig rotete inne no. Heldigvis er det så mørkt bilete at de ikkje ser alt.







Denne kommoden såg eg på Plant Eit Tre gjenbruksbutikk i Øystese sist laurdag. Eg var egentleg ute etter ein skjenk, men det var ingen som fall i smak der då. Såg litt på kommoden, men tenkte at eg ikkje trong han. På tysdag kom eg plutseleg på at eg ville ha kommoden likevel, så eg heiv meg på telefonen og tenkte eg ville reservera han, men ingen tok telefonen. Så eg køyrde inn til Øystese med det same. Då eg parkerte bilen såg eg gjennom vindauga at kommoden ikkje stod der, men heldigvis hadde han berre vorte flytta. Tenkte eg kunne ha dukar i kommoden. Han er laga av beisa og lakkert furu, ikkje heilt same farge som framskapet på sida. Og bordet og stolane er i enno ein annan brun-nyanse. Får mala alt kvitt viss eg ikkje klarar venja meg til det.